Sunday, October 22, 2017

விஷ்ணு சித்தன் ஸ்ரீராம்

என்னுடைய மன்னார்குடி டேஸ் அத்யாயங்களை ஏராளமாக ஆக்கிரமித்தவன் ஸ்ரீராம். தரை எட்டாத பெரிய சைக்கிளில் மேனியைக் கோணி காலூன்றி நின்று கொண்டு “வெங்குட்டூ..” என்று “டு” வை “டூ”வாக்கி நீட்டி முழக்கி கொல்லை வரைக் கூப்பிடுவான். காது மந்தமான சாரதா பாட்டியே “ஜில்லாலி வந்துருக்கான் போல்ருக்கு....” என்று மூக்குக் கண்ணாடியைத் தூக்கி விட்டுக்கொண்டு தோராயமாக வாசலைப் பார்ப்பாள். மன்னையில் ஹரித்ராநதி மதில் கட்டையிலும் சரி மற்ற இடங்களிலும் சரி ஸ்ரீராம்தான் தோதான கம்பெனி. எனக்கு படிப்பில் ஜூனியர். பாக்கி விஷயத்தில் சீனியர்.
பத்து நாட்களுக்கு முன் ஒரு நாள் “வெங்குட்டு.. பசங்களுக்கு பூணூல் வச்சுருக்கேன். வந்துடு..” என்று அழைத்திருந்தான். தரையில் நிற்க நேரமில்லாமல் விமானத்தில் சுற்றிக்கொண்டே இருந்ததால் உபநயனத்திற்கு செல்ல முடியவில்லை. வடுக்களை ஆசீர்வதிக்க நேற்று இல்லம் தேடிச் சென்று பார்த்தேன்.
பஞ்சகச்சமும் தாடியும் மீசையுமாக ’விஷ்ணு’சித்தன் போல இருந்தான் ஸ்ரீராம். தாடிக்காக சித்தன் என்ற பதம் போடுவதற்காக விஷ்ணுவை இழுத்தேனே தவிர வேறொன்றும் மேற்கண்ட சொற்டொடரில் விசேஷமில்லை. உடனே யாரும் கல்ச்சுரல் விரோதி என்று பட்டம் கொடுத்து பாட்டா தூக்கவேண்டாம். பெரியாழ்வாரை சேவித்துக்கொள்கிறேன்.
”அபிவாதயே...” சொல்லி ரெண்டு வாண்டும் என்னை நமஸ்கரித்தார்கள். நேற்று நம்முடன் கிரிக்கெட் விளையாடியவனின் பசங்களா என்ற நினைப்பு பூரிப்பாக இருந்தது. டீஷர்ட்டைக் கழற்றி ஸமாச்ரயணம் செய்த சங்கையும் சக்கரத்தையும் தோளைத் திருப்பிக் காட்டினார்கள். தொட்டுப்பார்க்கும் ஆர்வக்கோளாறில் சங்கை அழுத்திவிட்டேன். ”ஸ்ப்பா... அழுத்திட்டீங்க.. வலிக்குது அங்கிள்...” என்று தோளை நகர்த்திக்கொண்டான் சின்னவன்.
“அங்கிள் ஒரு மேட்ச் விளையாடிட்டுதான் போகணும்..” என்று சின்னவன் (இந்தப் படத்தில் இருக்கும் விஷமன்) நச்சரிக்க ஆளுக்கு இரண்டு பேராய் அணி பிரிந்து காம்பௌண்ட் க்ரில் கேட்டை விக்கெட்டாக்கி விளையாடினோம். ரப்பர் பந்து போட்டி. "ஸ்ட்ரெயிட்டா அடிச்சா சிக்ஸ். அந்த சுவத்தை தாண்டினா ஃபோர். பக்கத்து வீட்டு காம்பௌண்டுக்குள்ளே தூக்கி அடிச்சா அவுட். ஒன் பிட்ச் ஒன் ஹாண்ட் அவுட்... மூனு தடவை பின்னாடி விட்டா அவுட்...” என்று வரிசையாய் விதிமுறைகளை எனக்குச் சொன்னான். அரை மணி விளையாடிவிட்டுதான் வீட்டுக்கு வந்தேன்.
குழந்தையாய் சின்னவன் சொன்ன விளையாட்டு விதிமுறைகள் போல வாழ்க்கைக்கு நம்மால் ரூல்ஸ் போடமுடியுமா? எத்தனை போடுவது? அப்படி போட்டால் தாண்டாமல்தான் இருக்க முடியுமா? ஆனால், ஸ்ரீராம் தாண்டாமல் இருக்கிறான். மன்னை ஸ்ரீவித்யா ராஜகோபாலனின் க்ருபை. மகிழ்ச்சி.

0 comments:

ஆடிய பிற ஆட்டங்கள்

Related Posts with Thumbnails