க்வில்லிங்

"பரீட்ஷை முடிஞ்சதும் வாங்கித்தருவியா?”

“ம்.”

“காட் ப்ராமிஸ்”

“ப்ராமிஸ் காட்” என்று சின்னவள் கையில் அடித்து சத்தியம் செய்து கொடுத்திருந்தேன்.

க்வில்லிங் செட். சிங்கப்பூர் ஷாப்பிக்கு சென்று “அதோ அந்த பீட்ஸ் குடுங்க.. அந்த ஷேப்பர்.. அது.. ம்... அதுதான்.... க்வில்லிங் டூல்ஸ் இருக்கா?..” என்று தேடித்தேடி அந்தப் பொடியனை இடுப்பொடிய வேலை வாங்கியாயிற்று.

ஆஃபீஸில் ஈவினிங் ஒரு மீட்டிங்கில் இருந்தேன். ஃபேஸ்டைம் கிணிங்கிணிங்கென்று சிணுசிணுத்தது. ”எக்ஸ்க்யூஸ் மீ” சொல்லிட்டு எடுத்தேன். “அப்பா.. பார்த்தியா.. எப்டியிருக்கு.. “ என்று கொஞ்சு தமிழில் பேசி இதைக் குலுக்கிக் காட்டினாள்.

வீட்டிற்குள் நுழைந்தவுடன் காது நுணியில் இவைகளை ஒவ்வொன்றாய் வைத்து தலையை இங்குமங்கும் ஆட்டினாள்.

எதையோ புதிதாய் செய்ததற்கான பெருமிதம் கண்களில் மின்னியது. அவள் விழியசைவில் தெய்வங்கள் சொர்க்கத்தோடு இறங்கி வீட்டிற்குள் முகாமிட்டன. மண்ணில் இதைவிட சொர்க்கமுண்டோ! என்ற வரிகள் பாடலாய் செவிகளை நிறைத்தது. இப்போது அவள் கண்மூடித் தூங்குகிறாள். இவைகள் என்னுடன் அழகியல் பேசுகின்றன. நான் உருகி எழுதிக்கொண்டிருக்கிறேன்.